Monthly Archives: September 2014

Ministeriu Turismu Organiza Treinamentu ba Taxista

 

IMG_2549Ministeriu Turismu servisu hamutuk ho Instituisaun relevante halo formasaun ba taxista iha kapital Díli ho intensaun atu bele sensibiliza partisipante sira konaba étika, regra no prosedimentu nebé ligadu iha area nebé refere.

Treinamentu nebé halao iha Centro de Convenções de Díli, foka liu konaba étika, profisaun, regras trânzitu no atendimentu ba públiku. Husi parte Ministériu Turismu, Director Nasional Planu no Desenvolvimentu Turístiku, António Ximenes explika liu konaba étika no profisaun atu bele fó konhese diak liu tan ba taxista sira konaba aspektu hirak neé hodi bele aplika iha servisu loron-loron. Comandante Unidade Trâzitu PNTL, António Soares iha nia intervensaun explika konaba Lei, Regras Trânzitu no kondisaun kareta wainhira halao movimentu atu nuné bele aumenta konhesimentu partisipante sira nian konaba aspektu ida neé. Entretanto, husi parte Ministério Transportes e Comunicações, funsionariu senior husi Diresaun Nasional Transporte Terrestre, Abel da Conceição koalia mós konaba regras no atendimentu ba públiku. Mekanismu atendimentu ba públiku iha aeroporto, explika husi Direktor Aviasaun Sivil, Mário Gomes. Partisipantes hatudu entuziasmu no elojia inisiativa husi Ministériu Turismu hodi organiza treinamentu ida neé tamba bele motiva no aumenta sira nia konhesimentu konaba knar lolós ba ema nebé ho profisaun nudar taxista. Treinamentu ida neé halao durante loron rua, konta ho partisipantes taxista Atus Rua Resin.

Advertisements

Ministériu do Turismo Organiza Tour de Timor 2014

IMG_9050IMG_9180   IMG_9301

Ministeriu do Turismo, liu husi Diresaun Nasional de Marketing organiza Eventu Tour de Timor nudar programa anual Instituisaun neé nian nebé ho objektivu atu promove dame no espíritu amizade entre povu, profisionaliza siklista Timor Oan no oportunidade ida atu bele hatudu ba mundu katak, povu Timor Leste moris iha situasaun paz no trankuilidade.

Tour de Timor iha tinan ida neé ho trajektu haleu parte Oeste no Central Timor Leste nian hanesan: Díli-Gleno-Hatolia-Balibó-Haubá-Gleno no fila hikas mai Díli.

Iha partida Tour de Timor husi Palasiu do Governu nia oin marka prezensa husi Ministru do Turismo, Francisco Kalbuadi Lay akompanha husi Secretaria de Estadu SEAPRI, Veneranda Lemos, Embaixador Australia iha Timor leste no konvidadus seluk.

Eventu Tour de Timor ne’e hetan partisipasaun husi Siklista Nasional hamutuk 42 no Internasional 43 mai husi Nasaun sira hanesan: Australia, Canada, Malaysia, Singapura, EUA, Afrika do Sul, Portugal, Holanda no Reino Unido.

Kordenador Tour de Timor 2014, Aquilino do Santos Caeiro, nudar Director Nacional Marketing, afirma katak sente orgulhu tamba iha tinan ida neé maske ho difikuldade no limiti oioin, maibe Ministério do Turismo hamutuk ho instituisaun relevante sira konsegue halao duni eventu Tour de Timor.

Tinan ida neé, Komisaun Organizadora servisu hamutuk ho instituisaun relevante hanesan: Ministériu Saude kolabora ho ekipa médika husi Darwin, Ministério das Finanças liu husi Diresaun Nasional das Alfândegas, Polícia Nacional de Timor Leste, Unidade de Imigração, Secretaria de Estado da Juventude e Desporto no Federação Siklismu Timor-Leste hodi realiza eventu desportivu neé ho susesu.

Timor Telecom kontinua nudar  patrosinador prinsipal ba eventu Tour de Timor no fornesedor ofisial iha servisu komunikasaun durante eventu desportivu neé.

Alein de Timor Telecom, eventu Tour de Timor tinan neé hetan mós apoiu husi agensias seluk hanesan: Airnorth, Air Timor, CDX Express, National Critical Care no seluktan.

Tour de Timor hahú husi loron 13 no remata iha loron 17 de Setembro 2014.