Monthly Archives: April 2014

Ministru Kalbuadi: China, potensia bo’ot ba setor turismo iha mundu

Ministru Turismo asina MoU

Photo by Valentino Dariel

PM Xanana asiste asina akordu entre Ministerio Turismo China ho Timor Leste

Photo by Valentino Dariel

Ministeriu Turismo Timor Leste foin lalais ne’e asina akordu koperasaun ho Ministerio Turismo Republika China, durante primeira visita ofisial delegasaun Timor Leste nebe chefia husi Primeiro Ministru Kay Rala Xanana Gusmao iha China.

Akordu kooperasaun nebe asina direitamente husi Ministru Francisco Kalbuadi lay no Ministru Turismo China  Shao Qiwei ne’e foka liu ba iha area rekursu humanu, infrastrutura, apoiu tekniku, desenvolvimentu setor turismo nebe inklui mos agensia no hotelaria.

 

Photo by Valentino Dariel

Ministru Turismo Kalbuadi hateten Primeiro Ministru China mos fo ona indikasaun katak China sei fo apoio Timor Leste iha various areas inclui setor turismo.

Iha nia intervista Ministru Kalbuadi hateten China sai hanesan parseiru importante ba desenvolvimentu setor turismo iha Timor Leste no internasional.

“China agora sai hanesan potensia ida nebe mak bot liu iha mundu,tamba turista China nebe mak sai ba liur kada tinan maizumenus Tresenta Milhioes turista ba iha mundu tomak”.

“China promete sei ajuda ita liliu iha area hotelaria, hau mos hasoru empresariu lubuk ida nebe mak interese atu konstrui hotel iha Timor Leste inclui iha capital Dili to’o ba distritu sira seluk, tamba ne’e tenke prepara didiak.”

Visita ofisial iha China

Photo by Valentino Dariel

Visita ofisial iha China

Photo by Valentino Dariel

Atu realiza akordu ne’e Ministeriu Turismo Timor Leste sei kordena ho embaixada rua China ho Timor Leste nomos Ministerio Negosius Estrangeirus. Alende ne’e ekipa tekniku husi Ministerio Turismo iha tempu besik sei ba China hodi kordena ho tekniku sira iha China hodi bele prepara ba implementasaun akordu refere.

Timor Leste iha potensia bot ba area turismo, nudar futuru petroleum, Ministru Kalbuadi hateten area ne’e tenke explora no kopera didiak no halo ligasaun diak ho nasaun Asean, nasaun Asia hanesan Korea. Nunemos iha area Pasifiku liliu nasaun Australia ho Fiji.

Advertisements

Universidade USA iha interese apoia Turismo Timor Leste

IMG_5753Prof. Dr. Sr. Linwood Pendeleton husi Duke University U.S. hasoru malu ho Director-Geral do Turismo, Silvino Sampaio Gonçalves hodi diskuti konaba kestaun Turismo tasi laran nian.

Durante sorumutu neé, Prof. Dr. Lindwood husu ba Ministerio Turismo atu bele sugere ba Universidade Timor-Leste hodi bele loke formasaun ida kona ba Luku (Diving school).

Alein de neé, Linwood liu husi Programador Especial Embaixada Amerika iha Timor Leste, Leopoldo Gusmão hatoó mós sira nia plano atu haruka périto tasi laran nian mai Timor leste hodi bele ajuda Ministerio Turismo halo pesquisa konaba tasi laran.

Molok remata sorumutu, equipa Ministerio do Turismo hamutuk ho equipa Prof. Dr. Linwood konkorda atu buka oportunidade ida hodi bele hatudu filme dokumentariu badak kona ba “Coral Triangle” nebé efisiente tebés divulga ba públiku, atu nuné bele sensibiliza komunidade konaba importansia atu prezerva ita nia tasi laran.

Prof Dr.Linwood mos hatudu entusiasmu makas ho sorumutu ne’ebe halao ho ministeriu turismo tamba konsidera positivu tebes ba parte rua ne’e. (***)

 

MT Observa Konstrusaun Muru Monumentu Dom Boaventura

img_2364Ministério Turismo nebé representa husi Director-Geral Turismo, Silvino Sampaio Gonçalves hamutuk ho komitiva desloka ba Distritu Manufahi hodi haré directamente projektu kontrusaun Muru ba Monumentu Dom Boaventura iha Luak, distritu Manufahi.

Projektu konstrusaun neé hamosu preokupasaun ba representante povu iha Uma Fukun Parlamentu Nacional tamba tuir sira nia haré katak, projektu neé laiha kualidade no seidauk finaliza tamba  parte balun husi muru neé komesa monu.

Haré ba situasaun neé, Ministério Turismo hola inisiativa desloka diretamente ba fatin konstrusaun atu bele identifika no verifika lolos situasaun neé. Molok desloka ba Luak, Director-Geral ho komitiva halao enkontru urgente ho Autoridade Lokal distritu Manufahi iha Administrasaun hodi haré ba asuntu neé.

Hafoin halao observasaun direta ba fatin konstrusaun, Director-Geral Silvino Sampaio Gonçalves explika katak intensaun husi deslokasaun neé atu bele haré diretamente situasaun nebé hamosu preokupasaun no polemika iha Media konaba konstrusaun nebé refere, atu nuné hamutuk bele buka alternativa ka solusaun ba asuntu neé, hodi bele servisu hamutuk diak liu tan bele implementa projektu neé ho kualidade tamba sei benefisia ba interese nasional.

Reprezentante Kompanhia Los Cabubo, Riak Leman konfesa katak, nia parte rekonhese iha duni falhansu balun iha aliserse tamba medida nebé sira aplika la kondiz dezenhu, tamba neé ho prezensa husi parte rua, nia fó kedas ordem ba mandor hodi sobu no halo tuir kedas dezenhu nebé entrega husi Ministério Turismo.
img_2354 Entretanto konaba muru nebé fó sai iha Media katak monu, Riak Leman rejeita informsaun neé no deklara katak, nia rasik mak haruka sobu tamba trabalhador sira halo kleuk la tuir dezenhu.

Husi parte Autoridade Lokal, Administrador Distritu Manufahi, Filomeno Tilman deklara katak tuir sira nia observasaun iha realidade hatudu duni katak konstrusaun neé laiha kualidade, maibe ho deklarasaun no promesa husi representante Kompanhia katak sei sobu parte sira nebé halo la tuir dezenhu no hadia, entaun hein katak projektu neé bele finalize ho kualidade tamba Monumentu D. Boaventura wahinhira sai kapas laos deit ba interese komunidade Manufahi maibe ba Povu Timor Leste tomak.

Orsamentu ba Projektu Konstrusaun Muru Monumentu Dom Boaventura aprova husi Parlamentu Nasional ho valor Dolar Amerikanu Rihun Atus Rua no responsabiliza husi Kompanhia Los Cabubo.